Parasurat Bikolnon 

padagos an pagsaringsing poon kan 2010

An Parasurat Bikolnon sarong kasararoan nin mga indibidwal sa Kabikolan na nagtutulod kan mga tataramon asin panurat Bikolnon. Namuknâ ini kan Abril 17, 2010 sa Syudad nin Naga huli sa pangangaipo nin lindong kan mga parasurat na yaon sa gayad kan sosyodad. Tinugdas ini asin inot na pinamayohan ni Bernardo Miguel Aguay, Jr. kan Calabanga, Camarines Sur kaiba an mga kapwa parasurat na sinda Marissa Redburn, Jusan Misolas asin Kevin de Quiroz kan Syudad nin Naga, Jerome Hipolito asin Edna Campana kan Calabanga, sagkod Irvin Sto. Tomas kan Canaman, Camarines Sur.

Naipaguhit kan Marso 23, 2012 an organisasyon bilang Parasurat Bikolnon Inc. sa Securities and Exchange Commision sa Syudad nin Legazpi bilang sarong non-stock, non-profit na organisasyon asin tinàwan ini nin Corporation Number 201228626. Bago kaini, independenteng naipublikar kan organisasyon an Mga Labod sa Daghan kan Bulod (2011) ninda Marissa Redburn asin Jocelyn Bisuña asin TULA.K.ARATULA (2011) ni Bernardo Miguel Aguay, Jr. Nagkapira sa mga inot na adbokasiya kan grupo iyo an pagkikisumaro asin pag-anduyog sa kapwa mga parasurat siring kan Pagpaumay ki Jo na sarong serye ng fund-raising sagkod pagtitipontipon kan 2010 asin 2011 sa Baao sagkod Syudad nin Naga tanganing magtaong suporta ki Jocelyn Bisuña na nagkaigwa nin breast cancer. Ipig-organisar man kaini an pagbungsod ng Poetry Galore At Last ni Dr. Ma. Lilia Realubit sa saiyang residensya sa Syudad nin Naga kan Pebrero 28, 2011. Nag-ambag asin nagtabang man an organisasyon sa publikasyon ng ikatulong isyu kan An Tambobong nin Literaturang Bikolnon folio Desyembre kan 2011.

Katuyohan kaini iyo an maitulod an pagpangataman asin pagpatalubo kan manlainlain na tataramon na Bikolnon sa manlainlain na paagi. Sa paagi kan publikasyon, ipinagpublikar man an PosporoKan Mag-ati an Tubig sa DagatFor-Guy, asin Pulitika ng Paghuhubad ni Aguay sa Bikol Komikon kan 2012 na ginibo sa Syudad nin Naga. Siring man nahaman kan organisasyon an Antabay sa Ortograpiya nin Bikol Sentral kan Abril 25, 2012 sa panginginot ni Irvin Sto. Tomas. Kan 2016 asin 2017, nagpublikar nin manlainlain na mga chapbook sa Better Living Through Xeroxography Naga (BLTX Naga) an mga myembro kan organisasyon.  Durungan na ibinungsod ni Anthony Diaz an Pataratarapadi (mga rikas-usipon), Kitil (mga tula) asin Kuyan (mga rawitdawit) sagkod Dai taka na padangat taka pa (mga rawitdawit). Siring man an koleksyon nin mga rawitdawit na Padangat ni Jerome Hipolito, Gapo ni Elbert Baeta,Taragoan Bingkay ni Aguay, Makot nin mga Rawitdawit ni Julius Bulahan, KAAYUPAN ni Ryan Cuatrona, #lapigotpa asin Bungkaras, ika na man ni Sto. Tomas, Ginisang Poesia asin Ginisang Poesia 2: mga pinirilian na rawitdawit) ni Sto. Tomas, Diaz asin Ian Kenneth Orasa, asin iba pang mga publikasyon.


Sa paagi kan akademya, nagpapadrino an organisasyon kan Paduronongan, sarong taonan na patiribayan sa Bikol Quiz, Tirigsikan sagkod kawat na Dama nin Tataramon kan mga eskwela sa DepED Canaman District sa pakikipagtabangan sa LGU Canaman, Camarines Sur asin iba pang organisasyon poon kan taon 2012. Inot na nakatao an organisasyon nin lektsur sagkod nagpakarhay nin workbook sa MTB-MLE sa Mary Bree Village Montessori, Syudad nin Naga kan Oktobre 2012. Bilang parte kan community outreach, nakipagtabangan na an organisasyon sa pagtaong workshop asin lektura sa San Antonio National High Schol sa Milaor, Cararayan National High School sa syudad nin Naga, asin DepEd Division of Catanduanes. Nagin parte man an organisasyon sa selebrasyon kan 5th Bikol Wikipedia Day: Aldaw nin Talingkas na Ensiklopedia kan Nobyembre 24, 2012 kaiba an Ateneo de Naga University asin an LGU Naga.

Aktibo man an organisasyon sa pagtulod kan manlainlain na tataramon na Bikolnon sa pampagbalangibog (mass media) sagkod elektronikong mga paagi. Inot na nagin tagapagtaram an mga myembro kaini sa Pamana ng Lahi na sarong programa sa DZGE ni Tess Pielago kan Marso 25, 2012 sagkod sa mga nagsunod na semana. Nagin bisita man sinda sa Tonton Balagon na sarong programa sa DWNX ni Abang Mabolo kan Mayo 11, 2012. Sa programang Boses ni Lolo sa DWRN ni Mon Olaño, nagin bisita man ini para sa espesyal na programa para Bulan nin Arte kan Pebrero 21, 2015. Nagin bisita sa programang Ini an Totoo ni Ernie Verdadero sa GNNTV48 si Sabina Marites Decasola, Ian Kenneth Orasa asin Irvin Sto. Tomas petsa Oktobre 5, 2016. Sa paagi nin short messaging system (SMS) o texting, pinadrinohan kan organisasyon poon Desyembre 2012 sagkod Marso 2013 an TigsTXT, sarong bulanan na patiribayan sa pagtigsik gamit an cellphone bilang behikulo, sa peryodikong Bicol Mail asin ini inaanduyogan man kan LGU Naga. Nasundan pa ini kan TigsTXT Reloaded kan Abril sagkod Hulyo 2018 sa pakikipagtabangan kan Bicol Standard asin Kintab Artists Group. Kan Abril 8-9, 2018, ginibo an Buklat: an Art and Book Expo sa #98 Gallery sa pakikipagtabangan kan Kintab Artists Group kun sain nagkaigwa nin book expo, art workshop, film viewing, open mic asin iba pa bilang fund-raising activity para sa ikawalong Saringsing National Writers Workshop.

Siring man, kamàwotan man kaini an maipadagos an danay na relasyon sa ibang lokal asin pangkinaban na mga kasararoan nin mga parasurat. Yaon man an suporta kan organisasyon sa manlainlain na paghirô asin aktibidad na inorganisar kan mga kapwa parasurat. Katuwang man an organisasyon sa pagpadalagan kan San Miguel Bay Writer's Workshop kan CBSUA Calabanga asin The Writer's Project sa Calabanga, Camarines Sur, asin sa mga aktibidad kan SurTe sa Virac, Catanduanes, mga kabtang kan organisasyon. Nakikipagtabangan man ini sa mga paghiro kan Project Susog sa Buhi, Camarines Sur, asin Kintab Artists Group sa Pili, Camarines Sur kun sain ginibo an Pagkarahay sa CBSUA kan Pebrero 2018. 


Nagtukaw si Redburn bilang nagin ikaduwang Pamayo kan organisasyon kan Abril 20 sagkod Oktobre 12, 2012. Bago pa kaini, saiya nang pinamayohan ini bilang kasalihid na Pamayo ki Buboy Aguay. Ipinadagos ni Digna Ruth Daliva bilang ikatulong Pamayo, an pagpadalagan kan organisasyon sagkod na mapili an mga bagong opisyales kan Desyembre 22, 2014. Nagin ikaapat na Pamayo kan organisasyon si Froy Beraña bago maantos an taon 2014 sagkod Abril 17, 2016 kun sain napili bilang ikalimang Pamayo si Irvin Sto. Tomas (2016-2017). Sagkod kan 2017, regular nang pinipili an Pamayo kan organisasyon lambang aldaw nin pagkakatugdas kaini na igwa nin sarong taon na termino: Julius Bulahan (2017-2018), Elbert Baeta (2018-2019), asin sa presente, Jerome Hipolito (2019-2020).

Sa masurunod na taon, dakulang pagkakataon siring man angat sa grupo an paghimò nin mga publikasyon na magagamit sa pagtukdô kan kinagimàtan na tataramon sa elementarya huli kan Mother Tongue-Based Multilingual Education sa irarom kan K-to-12 Curriculumn kan Departamento nin Edukasyon (DepEd). Inaandaman man kaini an mga aktibidad na urog na mapapusog kan organisasyon tanganing maitulod an mga proyekto asin adbokasiya para sa mga tataramon asin panurat Bikolnon.


Mga ladawan (Saringsing Writers Workshop kan Marso 2012; organization meeting kan Enero 2013; Ika-3 anibersaryo kan Abril 2013, Saringsing Writers Workshop kan Abril 2016)