Parasurat Bikolnon 

an organization of Bicolano writers in the margins

 Parasurat, nag-arANI sa CCP

Syudad nin Pasay -- Onseng Bikolnon an nakaayon sa ika-39ng luwas kan librong Ani na ipinagpupubilkar kan Cultural Center of the Philippines (CCP). An tema ngunyan na taon iyo an Kahayupan/The Animal Kingdom. Kabilang sa mga naipaladang mga obra iyo an mga usipon asin rawitdawit sa Bikol Sentral, Rinconada Bikol, Filipino asin Ingles kan mga myembro kan Parasurat Bikolnon. Inot na luwas ini kan obra ninda Julius Bulahan, Ian Kenneth Orasa, Sabina Lañada asin Elbert Baeta. Kadungan man ninda an mga panurat ninda Honesto Pesimo Jr., Emmanuel Barrameda asin Eilyn Nidea. [10/1/2016]

 Mga tula na Aguay, Popa maluwas sa Likhaan 10

Syudad nin Quezon  -- Napili an mga tula ninda Buboy Aguay asin Allan Popa kaiba an 18ng iba pang mga parasurat sa nasyon para sa ika-10ng luwas kan publikasyon na Likhaan na ipinagpupublikar ka UP Institute of Creative Writing. Ipapalagda sa edisyon na ini an iba pang manlainlain na panurat sa halipot na usipon, saysay asin rawitdawit sa tataramon na Tagalog asin Ingles. An direktor kan UP Press asin bantog na parasurat asin kritikong si  J. Neil C. Garcia iyo an editor kan publikasyon ngunyan na taon. [9/30/2016]

19ng Bikolnon nag-Saringsing 6

Syudad nin Naga --  Nagtapos an kagsiyam na susuprang na parasurat sa ginibong ika-6 na Saringsing Writers Workshop na pinadrinohan kan Lokal na Gobyerno nin Naga asin Sumaro Bikolnon.

Sinda iyo si Mon Joar Imperial,  Rency Asas, Clarisse Molin, John Cris Pineda, Abegail Sta. Ana asin Clinton Caceres, anas gikan sa Calabanga, Cam. Sur; Marvin Aquino (Tinambac, Cam.Sur); Mary A. Galvez asin Michael Sales (Pili, Cam.Sur); Mack Tuzon (Canaman, Cam.Sur); Nicky Gem Rivera (Baao, Cam.Sur); Gilmar Baran (Balatan, Cam.Sur); Danny Boy B. Nacario (Iriga City), Leopoldo C. Brizuela Jr. (Ligao, Albay);  Emmanuel Barrameda (Catanduanes); sagkod Armie Cardema-Cedo, Rizalyn Sahagun asin Ahj Eufracio (Naga City) . [4/19/2016]

Parasurat, naglabto sa SULOG

Syudad nin Naga -- Kaiba an manlainlain na indibidwal asin organisasyon, nakisumaro an Parasurat Bikolnon sa SULOG o Sumaro sa Salog, sarong adbokasiya na nagmamàwot buhayon liwat an Salog Naga. Nagin parte kan programa iyo an pagsakay kan nagkapirang partisipantes poon sa Tabuco pasiring sa Tinago kun sain simbolikong nagwarak nin bokashi balls tanganing malinigan an salog. Siring man sa Tinago Barangay Hall, nagpahiling nin comedy skit, monologue asin nagrawitdawit an mga myembro kan organisasyon bilang pagkikisumaro sa okasyon. An aktibidad hinimò ni Doods Santos, sarong propesora sa Ateneo de Naga University. [5/10/2015]

Parasurat Bikolnon, ipigselebrar an ika-5ng taon

Pili, Camarines Sur-- Nagtanom nin mga kahoy, nagsosog kan sulog nin salog asin nagbasa nin rawitdawit an mga myembro kan Parasurat Bikolnon bilang pagselebrar kan ikalimang taon nin pagkakamukna kan organisasyon.

Nakisumaro sa okasyon an anom na nagsusubang na parasurat na napili para sa Ika-5ng Saringsing Writers Workshop asin an mga bisitang kritikong sinda H. Francisco Peñones Jr., Estelito Jacob, Honesto Pesimo Jr., Jose Jason Chancoco, Irmina Torres, Aileen Nidea asin Paz Verdades Santos. Ginibo an workshop sa residensya kan mga Redburn poon Abril 17 sagkod 19 kun sain nagin direktor digdi iyo si Elbert Baeta na sarong paratukdo sa CBSUA Pili.

Nagsumpa man an mga bagong myembro kan organisasyon kabali an mga partisipante kan Saringsing Writers Workshop kan 2014. [4/22/2015]

Literary folio, nirimpos ni Misolas

Syudad nin Naga-- Liwat na nagpaluwas kan Rimpos folio sa pamamayo ni Jusan Misolas bilang poon-tagapakarhay an Departament of Literature and Language Studies kan Ateneo de Naga University. Ini an ikatulong luwas kan publikasyon na inot nabasa kan 1999 dangan kan 2003. Laman kan babasahon an mga rawitdawit, halipot na usipon asin saysay sa Bikol, Filipino asin Ingles na sinurat nin mga estudyante, paratukdo, alumnay asin iba pang mga paraambag.

Si Misolas nagin man tagapakarhay nin nagkapirang publikasyon siring kan An Tambobong nin Literaturang BikolnonSural asin Tilad. Liban sa Parasurat Bikolnon, siya aktibong myembro man kan Ateneo Literary Association (ALA). [3/26/2015]

Parasurat nakisumaro sa Girok, Boses ni Lolo

Syudad nin Naga -- Bilang pakikisumaro, nagbasa nin mga rawitdawit an mga myembro kan Parasurat Bikolnon sa magkasuhay na okasyon na inandam kan Kabulig-Bikol asin Sumaro Bikolnon para sa selebrasyon kan Bulan nin Arte. Nahinanyog sa sarong banggi nin erotikang rawitdawit an mga panurat ninda Jerome Hipolito, Buboy Aguay asin Marissa Redburn sa Kinamon Bar sa ikaduwang Girok, sarong dinner for a cause. Mantang sa programang panradyo sa DWRN na Boses ni Lolo ni Ramon Olaño kan Sumaro Bikolnon, nagbasa man kan saiyang panurat si Irvin Sto. Tomas. Siring man, nahinanyog sa programa an nagkapirang rawitdawit ni Jerry Adrados, bilang pagromdom sa saiya. [2/30/2015]  

Mga bagong opisyal kan PB, napili

Pili, Camarines Sur-- Napiling mga bagong pamayong opisyal na mapadalagan asin mapangataman kan organisasyon sinda Froy B. Beraña bilang Pamayo kan Parasurat Bikolnon asin Bernardo Miguel O. Aguay Jr. bilang Tagapamayo kan Board of Trustees kaini, kun sain myembro sinda Marissa R. Redburn, Jerome M. Hipolito, Irvin P. Sto. Tomas asin Froy B. Beraña Bagong mga may-katungdan sa organisasyon iyo sinda Aguay bilang Ikaduwang Pamayo, Elbert O. Baeta (Kahilom), Hipolito (Tagapangataman Yaman), Sto. Tomas (Tagasiyasat) asin Jusan V. Misolas (Tagapabalangibog).

Sa halipot na panahon, nagtukaw si Redburn bilang Pamayo kan organisasyon kan Abril 20 sagkod Oktobre 12, 2012. Bago pa kaini, saiya nang pinamayohan ini bilang kasalihid na Pamayo. Ipinadagos ni Digna Ruth C. Daliva an pagpadalagan kan organisasyon sagkod na mapili an mga bagong opisyales kan Desyembre 22, 2014.  Sa laog kan pagpadalagan ninda Redburn asin Daliva, matriyumpong naipadagos an Saringsing Writers Workshop, ginibo an Ruab para sa Aking Parabasa 1 & 2, nakapagpadrino ini sa Padurunongan kan 2012 - 2014, nakaparehistro nin account sa bangko an organisayon, sagkod iba pa. [12/30/2014]

Ika-4 na Saringsing Writers Workshop,  nagsuprang

Pili, Camarines Sur-- Matriyumpong nadagos an tulong-aldawon na Saringsing Writers Workshop na ginibo sa Central Biool State University of Agriculture sa Pili, Camarines Sur kan Desyembre 21 sagkod 23, 2014. 

Sampulong mga bagong parasurat an nagtapos sa hunglonan nin pagsurat kabali sinda Rommel R. Alanis,  Jeffrey B. Teaño,  Ma. Cecilia C. Dela Rosa, anas taga Syudad nin Naga; Digna Ruth C. Davila kan Magarao, Camarines Sur; Victor P. Sayangco kan Calabanga, Camarines Sur; Lorenz C. Almendras asin Ernesto P. Dacillo Jr. kan Nabua, Camarines Sur; Mark Yu-Solares kan Balatan, Camarines Sur; Jose Alfonso B. Garalde kan Legazpi City, Albay; asin Clinton D. Abilong kan Pio V. Corpus, Masbate. Nagin direktor kan workshop ngunyan na taon si Jerome M. Hipolto na paratukdo man sa CBSUA Calabanga Campus.  [12/30/2014]

RUAB para sa Aking Parabasa 2, nagbungkaras

Canaman, Camarines Sur -- Katakod kan Bulan nin Pagbasa o National Book Month, ginibo an ikaduwang taon kan RUAB para sa Aking Parabasa kan Nobyembre 9, 2014.  Katuyohan kan aktibidad na makadonar nin mga librong Bikolnon sa Poro Elementary School asin Calambog Elementary School, an mga benepisyaryong eskwelahan ngunyan na taon. Igwang tulong kategorya an padalagan, an 5K, 10K asin 21K na nag-agi sa pitong barangay sa banwaan nin Canaman.  

Kan Agosto 2012, ginibo an inot na RUAB para sa Aking Parabasa sa Syudad nin Naga na binalihan nin labi sanggatos na paradalagan. Nagin benepisyaryong eskwelahan kan padalagan an Triangulo Elementary School asin Canaman Central School. [11/9/2014]

Mangayawan ES, kampeon sa Padurunongan 2014

Canaman, Camarines Sur -- Nanginot an mga eswela kan Mangayawan Elementary School sa patiribayan sa Tigsik asin Bikol Quiz tanganing makua an over-all champion sa Padurunongan 2014. Nagin resipyente an mga ini kan Aking Parabasa book package hali sa Parasurat Bikolnon bilang premyo.

Nagin hurado sa patiribayan an mga myembro kan organisasyon na sinda Jerome Hipolito, Rey Christian Rosales, Anthony Diaz asin Imelda Brazal. Ini na an ikatulong taon nin pagpadrino asin pakikisumaro kan organisasyon sa selebrasyon kan Bulan nin Tataramon kan LGU Canaman poon kan 2012. Namukna an Padurunongan kan 2010 sa pagpadalagan ni Irvin Sto. Tomas.  [8/30/2014]